As rapazas e rapaces de 5.º e 6.º de educación primaria do colexio El Castro celebramos o Día
das Letras Galegas gozando de novo dos marabillosos libros escritos pola
homenaxeada deste ano. Para tal ocasión eliximos Mar adiante e O amor e as
palabras. Ambos fixeron as delicias de todos nós.
Unhas semanas antes do 17 de maio os alumnos fixeron diversos traballos de
investigación en grupo que lles permitiron coñecer a historia do Día das Letras
Galegas, a obra de Mª Victoria Moreno, a relación tal especial que tiña coa
cidade de Pontevedra e, sobre todo, descubrir a personalidade desta muller
excepcional que adoraba a nosa lingua. Especialmente interesante resultou o
traballo titulado A escola nos anos 40 e 50 (anos da infancia de Mª Victoria Moreno).
A consigna para realizalo era obter toda a información que precisaban mantendo unicamente
entrevistas cos seus avós. Debían pescudar como eran as aulas, que era o que se
ensinaba e como se facía, o rol que desempeñaba a relixión, as materias que se
estudaban e a situación das nenas na escola daquela época. As exposicións
resultaron ser de grande interese e
espertaron a curiosidade dos rapaces, que esgotaron o tempo destinado a facer
preguntas. Estes traballos serviron de escusa para realizar outros cuxas
temáticas foron Outras mulleres que
descubrir: Ángela Ruíz Robles e As
bibliotecas: orixe, organización e elección das nosas preferidas.
Tamén aprendemos moitísimo grazas ás diversas e divertidas actividades
interactivas recollidas en fichas didácticas que propón a web Primavera das letras. Trátase dunha páxina creada a iniciativa
da Real Academia Galega e dedicada, desde 2016, ós homenaxeados o Día das
Letras Galegas. A súa bela estética e os seus interesantes contidos lograron
que fose un verdadeiro pracer utilizala como instrumento de aprendizaxe.
OS MORENOPÁXINAS
Outra das actividades coa que gozaron as rapazas e rapaces de 6.º de
educación primaria foi a elaboración dos morenopáxinas
(uns parcapáxinas dedicados ó Día das Letras Galegas e a Mª Victoria
Moreno) . Como podemos ver na imaxe,
utilizáronse diferentes materiais ó servizo da imaxinación e da creatividade.
